სომხეთის პრეზიდენტი არმენ სარქისიანი ქვეყნის პრემიერ-მინისტრს, ნიკოლ ფაშინიანს, შეხვდა, - ამის შესახებ ინფორმაციას სომხური მედია პრეზიდენტის პრესსამსახურზე დაყრდნობით ავრცელებს.
მათივე ინფორმაციით, შეხვედრაზე ქვეყანაში არსებული სიტუაცია და ვადამდელ საპარლამენტო არჩევნებთან დაკავშირებული საკითხები განიხილეს.
„პრეზიდენტმა და პრემიერ-მინისტრმა განიხილეს ქვეყანაში შექმნილი ვითარება, შიდა პოლიტიკური ატმოსფეროს გაუმჯობესებისკენ მიმართული ნაბიჯები და ვადამდელი საპარლამენტო არჩევნების ჩატარებასთან დაკავშირებული საკითხები. მათ წინა პლანზე წამოწიეს არჩევნების თავისუფალი და სამართლიანი ორგანიზებისკენ მიმართული აუცილებელი ნაბიჯების განხორციელების საკითხი, მათ შორის კონსტიტუციისა და საკანონმდებლო ჩარჩოს სრულყოფის გზით”, - ნათქვამია პრეზიდენტის პრესსამსახურის ინფორმაციაში.
შეგახსენებთ, სომხეთის პრემიერ-მინისტრმა ნიკოლ ფაშინიანმა რამდენიმე დღის წინ განაცხადა, რომ ქვეყანაში ვადამდელი საპარლამენტო არჩევნები 20 ივნისს ჩატარდება.