რუსი ოპოზიციონერი პოლიტიკოსის, პატიმრობაში მყოფი ალექსეი ნავალნის ჯანმრთელობის მდგომარეობა გაუარესდა. ამის შესახებ ნავალნის ადვოკატმა ოლგა მიხაილოვამ განაცხადა.

მისი თქმით, წინა დღით პოლიტიკოსს „ფეხი წაერთვა“, მანამდე კი, მისივე ცნობით, ნავალნის დიდხანს სტკიოდა ზურგი.

ადვოკატის განცხადებით, ამ დროისთვის ადვოკატები კოლონიასთან იმყოფებიან, სადაც ალექსეი ნავალნი სასჯელს იხდის, თუმცა, იქ მათ არ უშვებენ.

ნავალნის თანამებრძოლი ლეონიდ ვოლკოვი ვარაუდობს, რომ პოლიტიკოსი, შესაძლოა, ციხის საავადმყოფოში იყოს და ციხის ადმინისტრაციას ამ ფაქტის დამალვა სურს.

ალექსეი ნავალნი ქალაქ პაკროვის ნომერ მეორე კოლონიაშია მოთავსებული, სადაც ის 15 მარტიდან გადაიყვანეს.