საქართველოში 27 იანვარი ჰოლოკოსტის მსხვერპლთა ხსოვნის დღედ გამოცხადდა
საქართველოში 27 იანვარი ჰოლოკოსტის მსხვერპლთა ხსოვნის დღედ გამოცხადდა. აღნიშნულის შესახებ საქართველოს საგარეო საქმეთა მინისტრმა, ვიცე-პრემიერმა დავით ზალკალიანმა მთავრობის სხდომის დასრულების შემდეგ გამართულ ბრიფინგზე განაცხადა.
მინისტრის განცხადებით, საქართველოსა და ისრაელის სახელმწიფოებს შორის მეგობრული ურთიერთობის და ქართველ და ებრაელ ხალხს შორის მრავალსაუკუნოვანი კავშირების გათვალისწინებით, ეს მნიშვნელოვანი გადაწყვეტილებაა.
„დღეს, მთავრობის სხდომაზე მიღებული იქნა გადაწყვეტილება ჰოლოკოსტის დღის გამოცხადებასთან დაკავშირებით. 27 იანვარი გამოცხადდა ჰოლოკოსტის მსხვერპლთა ხსოვნის დღედ. ვფიქრობ, საქართველოსა და ისრაელის სახელმწიფოებს შორის მეგობრული ურთიერთობის და ქართველ და ებრაელ ხალხს შორის მრავალსაუკუნოვანი კავშირების გათვალისწინებით, ეს გადაწყვეტილება არის მნიშვნელოვანი. როგორც აქამდე აღვნიშნავდით, მომავალშიც გაგრძელდება, თუმცა უკვე ოფიციალურად არის გამოცხადებული როგორც ხსოვნის დღე“, - აღნიშნა დავით ზალკალიანმა.
