პარლამენტის ნდობის ჯგუფის სხდომა, სადაც 2020 წელს განხორციელებული საიდუმლო საქმიანობისა და სპეციალური პროგრამების შესახებ პენიტენციური სამსახურის ინფორმაციას ისმენდნენ, დასრულდა.

აღნიშნულ საკითხზე ნდობის ჯგუფის წევრებმა სპეციალური პენიტენციური სამსახურის გენერალური დირექტორის მოვალეობის შემსრულებელს ნიკა ცხვარაშვილს მოუსმინეს.

„სხდომაზე წარმოდგენილ იქნა ანგარიში 2020 წლის საქმიანობის იმ ნაწილის შესახებ, რომელიც არ არის საჯარო. ანგარიშის ფარგლებში იყო წარმოდგენილი ინფორმაცია სტრუქტურული დანაყოფების საქმიანობის შესახებ, ისევე როგორც განხორციელებული და მიმდინარე პროექტების შესახებ,"- განაცხადა სხდომის დასრულების შემდეგ თავდაცვისა და უშიშროების კომიტეტის თავმჯდომარე ირაკლი ბერაიამ.

მისივე თქმით, შემდეგი უწყებები, რომლის ანგარიშებსაც ნდობის ჯგუფი მოისმენს, სახელმწიფო დაცვის სპეციალური სამსახური და სახელმწიფო უსაფრთხოების სამსახური იქნება.