ოპოზიციის მიზანი რეალური კომპრომისი არ არის - მათი მცდელობაა, რეალური კომპრომისის ჩაშლა და ხელოვნური კრიზისის გაღრმავება, - ასე პასუხობს საპარლამენტო უმრავლესობის წევრი ირაკლი ქადაგიშვილი საკონსტიტუციო ცვლილებების პროექტზე ოპოზიციის გამოხმაურებას.
როგორც ქადაგიშვილმა ჟურნალისტებს განუცხადა, ოპოზიციას არც ერთ დემოკრატიულ ცვლილებაზე პასუხისმგებლობა არ აუღია.
„საკონსტიტუციო ცვლილებებზე ოპოზიციის უარი, სამწუხაროდ, პირველი არ არის. ეს იმას ნიშნავს, რომ ჩვენს პოლიტიკურ სპექტრს ვერ გაუთვიცნობიერებია, თუ რა არის მთავარი პოლიტიკური პროცესების რეალური გაჯანსაღებისათვის და რა არის მათი ამომრჩევლის რეალური მოთხოვნა. „ქართული ოცნების" მიერ კონსტიტუციის მიღება, საარჩევნო და სასამართლო რეფორმა - ეს ყველაფერი, სამწუხაროდ, ოპოზიციის მონაწილეობის გარეშე მოხდა. მათ არც ერთ დემოკრატიულ ცვლილებაზე პასუხისმგებლობა არ აუღიათ. მათი მიზანი რეალური კომპრომისი არ არის. მათი მცდელობაა რეალური კომპრომისის ჩაშლა და ხელოვნური კრიზისის გაღრმავება", - განაცხადა ირაკლი ქადაგიშვილმა.
პარლამენტში ინიცირებულია საკონსტიტუციო ცვლილებების პროექტი, რომელიც 2024 წლის საპარლამენტო არჩევნებისთვის 5%-იანი ბარიერის 3%-მდე დაწევას, ხოლო პარლამენტში ფრაქციის შექმნისთვის საჭირო მინიმალური რაოდენობის 7-დან 4-დეპუტატამდე შემცირებას ითვალისწინებს.