„ქართული ოცნების“ წევრის, სოზარ სუბარის შეფასებით, 3%-იანი საარჩევნო ბარიერი საქართველოს დღევანდელ მოცემულობას ყველაზე კარგად ესადაგება.
მისივე თქმით, 31 ოქტომბრის საპარლამენტო არჩევნებმა დაადასტურა, რომ 5%-იანი ბარიერი მართლაც მაღალია და აღნიშნული ბარიერის პირობებში, 2020 წლის არჩევნებში მას მხოლოდ ორი პარტია გადალახავდა.
„პოლიტიკური ვითარებიდან გამომდინარე შეიძლება ვიმსჯელოთ, იქნებ 1%, ბუნებრივი ბარიერი სჯობს. ამისთვის საჭიროა დიალოგი და პარლამენტში შემოსვლა. თუ პარლამენტში არ შემოვლენ, 5%-იანი ბარიერი დარჩება. მოგვწონს თუ არა, ასე დარჩება! ამიტომ კარგი იქნება, თუ პარლამენტში შემოვლენ. ძალიან კარგად გამოჩნდა, რომ „ნაციონალურ მოძრაობას“ ბარიერის დაწევა არ სურს, რადგან ამით ისინი პოლიტიკური ველის მიღმა ყველა ოპოზიციურ პარტიას ტოვებენ და მხოლოდ თვითონ რჩებიან. ეს არის მათი სურვილი, მაგრამ ოპოზიციური პარტიები უნდა მიხვდნენ, რომ ეს არ ჯდება არც ქვეყნის და არც მათ ინტერესში“, - განაცხადა სუბარმა პარლამენტში ინიცირებულ საკონსტიტუციო ცვლილებების კომენტირებისას.