ბელარუსში, პრეზიდენტ ალექსანდრე ლუკაშენკოს წინააღმდეგ გუშინ გამართული საპროტესტო აქციების დროს სამართალდამცავებმა 200-ზე მეტი ადამიანი დააკავეს, - „ევრონიუსის“ ინფორმაციით, ამის შესახებ შინაგან საქმეთა სამინისტროს პრესსპიკერმა ოლგა ჩემოდანოვამ განაცხადა.

გამოცემის ცნობით, მინსკის ცენტრში დიდი რაოდენობით პოლიციის მობილიზება განახორციელეს და წყლის ჭავლის მანქანები განათავსეს.

სოციალურ მედიაში გავრცელდა კადრები, სადაც ჩანს, როგორ აკავებენ სამართალდამცავები ადამიანებს.

ცნობისათვის, ბელარუსში გასულ წელს გამართული საპროტესტო აქციების დროს, რომლის მონაწილეებიც საპრეზიდენტო არჩევნების ოფიციალურ შედეგებს აპროტესტებდნენ და პრეზიდენტ ალექსანდრე ლუკაშენკოს გადადგომას მოითხოვდნენ, სამართალდამცავებმა 33 000-ზე მეტი ადამიანი დააკავეს.