თვითმხილველების ინფორმაციით, ბელორუსის უსაფრთხოების ძალების თანამშრომლები მინსკში ოპოზიციის აქციის წინ მოქალაქეებს აკავებენ. ძალოვან უწყებებში მედიას განუცხადეს, რომ კომენტარს მოგვიანებით გააკეთებენ. მანამდე, ოპოზიციამ მიმდინარე წლის პირველი მასშტაბური აქცია დააანონსა. მინსკის სხვადასხვა რაიონში დილიდან ძალოვანი სტრუქტურების სპეცტექნიკა განალაგეს. ეს ინფორმაცია „ინტერფაქსს“ ქვეყნის შინაგან საქმეთა სამინისტროს ოფიციალურმა წარმომადგენელმა ოლგა ჩემოდანოვამ დაუდასტურა.
მისივე თქმით, ყველაფერი „მშვიდად ხდება და კონტროლს ექვემდებარება“.
ამავდროულად, ხელისუფლებამ მოქალაქეები გააფრთხილა, რომ შაბათს არასანქცირებულ აქციაზე დაკავებული ყველა პირი სისხლის სამართლებრივ პასუხისგებაში მიეცემა.
27 მარტის არასანქცირებულ მასობრივ ღონისძიებებში მონაწილეობისკენ Telegram არხებით მოწოდების ფაქტებზე სისხლის სამართლის საქმე უკვე აღიძრა.