“როიტერსი“ - ალექსეი ნავალნიმ ტკივილის შემსუბუქების მიზნით საპატიმროში ტკივილგამაყუჩებლები მოითხოვა
რუსმა ოპოზიციონერმა ალექსეი ნავალნიმ ფეხის არეში ტკივილის შემსუბუქების მიზნით საპატიმროში ტკივილგამაყუჩებლები მოითხოვა, - ამ ინფორმაციას „როიტერსი“ საზოგადოებრივი მონიტორინგის კომისიაზე დაყრდნობით ავრცელებს.
პოლიტიკოსის თქმით, მას მწვავე ტკივილები აღენიშნება და აუცილებელი მედიკამენტები ესაჭიროება.
რამდენიმე დღის წინ რუსეთის ფედერალური სასჯელაღსრულების სამსახურის რეგიონალურმა განყოფილებამ გაავრცელა განცხადება, რომ ალექსეი ნავალნიმ ვლადიმირის რეგიონში არსებულ სასჯელაღსრულების კოლონიაში სამედიცინო შემოწმება გაიარა და მისი ჯანმრთელობის მდგომარეობა დამაკმაყოფილებელია.
ნავალნის ადვოკატმა ოლგა მიხაილოვამ კი განაცხადა, რომ პატიმრობაში მყოფი ოპოზიციონერი პოლიტიკოსის ჯანმრთელობის მდგომარეობა გაუარესდა. მისი თქმით, ადვოკატებს ნავალნის ნახვის უფლებას არ აძლევენ.
