იმისათვის, რომ პარლამენტი გახდეს ლეგიტიმური, ხალხის ნდობის მოსაპოვებლად აუცილებელია ვადამდელი არჩევნების დანიშვნა - ჩიხიდან გამოსასვლელად რიგგარეშე არჩევნები აუცილებელია, - ამის შესახებ "საქართველოს დემოკრატიული ინიციატივის" წარმომადგენელმა გვანცა წულუკიძემ ჟურნალისტებს ევროპული საბჭოს პრეზიდენტის პირად წარმომადგენელთან კრისტიან დანიელსონთან შეხვედრის დაწყებამდე განუცხადა.

მისივე თქმით, პარლამენტის რიგგარეშე არჩევნებს წინ უნდა უძღოდეს საარჩევნო რეფორმა და სასამართლო რეფორმა, რათა არჩევნები ნორმალურ რეჟიმში ჩატარდეს.

"მნიშვნელოვანია, სასამართლოში განხორციელდეს არა ფრაგმენტული ცვლილებები, როგორიც ახლა არის შემოთავაზებული ხელისუფლების მხრიდან, არამედ კომპლექსური და ყოვლისმომცველი რეფორმა, რაც იუსტიციის უმაღლესი საბჭოს რეფორმირებით უნდა დაიწყოს", - განაცხადა გვანცა წულუკიძემ.

სამოქალაქო ორგანიზაციები ქვეყანაში არსებული კრიზისის გადაჭრის გზებზე დანიელსონს საკუთარ ხედვებს აცნობენ.