ფრანგი ექიმები რეანიმაციულ განყოფილებებში კოვიდპაციენტების რაოდენობის ზრდის გამო შეშფოთებას გამოხატავენ
ფრანგი ექიმები აცხადებენ, რომ კოვიდინფიცირებულების რაოდენობის ზრდის გამო საავადმყოფოების რეანიმაციული განყოფილებები, შესაძლოა, მალე გადაიტვირთოს.
პარიზის რეგიონის საავადმყოფოების 41-მა მედიკოსმა გაზეთ Le Journal du Dimanche- ში გამოაქვეყნა სტატია, სადაც აღნიშნულია, რომ შესაძლოა მალე პაციენტებს შორის არჩევანის გაკეთება მოუწიოთ.
ამასთან, მეცნიერები ამტკიცებენ, რომ მთავრობის მიერ მაღალი გავრცელების ზონებში დაწესებული ნაწილობრივი შეზღუდვები არაადეკვატურია კორონავირუსის სწრაფად გავრცელებადი ვარიანტების ფონზე.
ცნობისათვის, საფრანგეთში, გასული დღის განმავლობაში კორონავირუსის 37 014 ახალი შემთხვევა გამოვლინდა და 131 ადამიანი გარდაიცვალა. რეანიმაციულ განყოფილებებში კი 4 872 პაციენტი მოხვდა.
ქვეყნის მთავრობა ვაქცინაციის კამპანიის დაჩქარებას ცდილობს. ბოლო მონაცემებით, საფრანგეთში კოვიდ 19-ის საწინააღმდეგო ვაქცინის პირველი დოზა 7.8 მილიონ ადამიანს აქვს გაკეთებული.
v-if="article.gallery" v-html="article.gallery"
