კომპრომისი ყველასთვის რთულია - ამის შესახებ ევროპული საბჭოს პრეზიდენტის შარლ მიშელის პირადმა წარმომადგენელმა კრისტიან დანიელსონმა პოლიტიკურ პარტიებთან შეხვედრის დასრულების შემდეგ განაცხადა.
მისივე თქმით, პოლიტიკური მზაობაა საჭირო, რომ ნაბიჯები გადაიდგას.
„რაც შემიძლია გითხრათ, ასეთი კომპრომისი ყველასთვის რთულია და ეს პოლიტიკურ მზაობას საჭიროებს, რომ პოლიტიკური ნაბიჯები გადაიდგას. მთავარია საქართველოს ეროვნული ინტერესი. ესაა გზა ამ პოლიტიკური კრიზისიდან გამოსვლისა. ასევე, მნიშვნელოვანია, რეალურ საკითხებზე ყურადღების გადატანა. ესაა - კოვიდ პანდემია, ეკონომიკა, ასევე საქართველოს ეროვნული უსაფრთხოება და საქართველოს ევროპული გზა“, - განაცხადა დანიელსონმა.
ცნობისთვის, ევროპული საბჭოს პრეზიდენტის შარლ მიშელის პირადმა წარმომადგენელმა კრისტიან დანიელსონმა დღეს დილიდან შეხვედრები გამართა პრემიერ-მინისტრთან და პრეზიდენტთან. ასევე მთელი დღის განმავლობაში მიმდინარეობდა პოლიტიკური პარტიებთან ინდივიდუალურ რეჟიმში შეხვედრები. დანიელსონი შეხვდა როგორც ხელისუფლების, ასევე ოპოზიციის ლიდერებს.