კომპანიების Pfizer-სა და BioNTech-ის მტკიცებით, მათ მიერ შექმნილი ვაქცინის 12-დან 15 წლამდე მოზარდებზე გამოცდამ აჩვენა, რომ ის უსაფრთხო და ეფექტურია და ძლიერ ანტისხეულებს წარმოქმნის.

Reuters-ის ინფორმაციით, კომპანიების განცხადებაში აღნიშნულია, რომ კვლევამ, რომელშიც 12-დან 15 წლამდე ასაკის 2 260 მოზარდი მონაწილეობდა, კოვიდ 19-ის პრევენციის კუთხით 100%-იანი ეფექტურობა აჩვენა.

Pfizer-ში ფიქრობენ, რომ აღნიშნულ ასაკობრივ ჯგუფში შემავალი პირების ვაქცინაცია შეიძლება მომავალი სასწავლო წლის დაწყებამდე დაიწყოს. კომპანიის აღმასრულებელი დირექტორის ალბერტ ბურლას განცხადებით, ისინი აშშ-ის საკვებისა და წამლის ადმინისტრაციასა და სხვა რეგულატორებს ვაქცინის ამ ასაკში გამოყენების ავტორიზაციის მინიჭების თხოვნით უახლოეს კვირებში მიმართავენ.

აღსანიშნავია, რომ Pfizer/BioNTech-ის ვაქცინა 16 წლისა და მეტი ასაკის პირებში გამოყენება უკვე ნებადართულია.