კორონავირუსის ახალი შემთხვევების მატების გამო შვედეთის ხელისუფლებამ შეზღუდვების ნაწილის შემსუბუქება მინიმუმ 3 მაისამდე გადადო.
ხელისუფლება გეგმავდა აღდგომის დღესასწაულის შემდეგ შეზღუდვების ნაწილი შეემსუბუქებინა, მათ შორის გაეზარდა დამსწრეთა დასაშვები რაოდენობის ზღვარი გასართობ პარკებში, კონცერტებსა და ფეხბურთის მატჩებზე. თუმცა ჯანდაცვის სამსახურმა განაცხადა, რომ ინფიცირების რიცხვის ზრდის გამო შემსუბუქების გეგმები უნდა გადაედოთ.
ხელისუფლებაში აცხადებენ, რომ სიტუაცია სერიოზულია და ინფექციის გავრცელების დონე მაღალია.
”ჩვენ ვიღებთ ცნობებს ჯანდაცვის სფეროში მძიმე მდგომარეობის შესახებ. ბევრ რეგიონში ინფექციის გავრცელება დრამატულად იზრდება“, - განაცხადა შვედეთის ჯანდაცვის სააგენტოს გენერალურმა დირექტორმა იოჰან კარლსონმა.
ოთხშაბათს, შვედეთში 8 400-ზე მეტი ახალი შემთხვევა გამოვლინდა და 35 პაციენტი გარდაიცვალა. მიუხედავად ამისა, ხელისუფლება უფრო მკაცრი ზომების დაწესების აუცილებლობას ვერ ხედავს.