პრემიერ-მინისტრი ბიზნესის ფართო ჩართულობით, რამდენიმე სათათბირო ორგანოს ქმნის , - ამის შესახებ საქართველოს ეკონომიკისა და მდგრადი განვითარების მინისტრმა ნათია თურნავამ განაცხადა.

მისი თქმით, პრემიერ-მინისტრს გაცხადებული აქვს სურვილი 10 - წლიანი განვითარების გეგმა შეიქმნას, რაც ბიზნესს მეტ კომფორტსა და სტაბილურობის განცდას შეუქმნის.

"ჩვენი მისწრაფება არის, მაქსიმალურად ბიზნესის წარმომადგენლები ჩაერთონ მდგრადი და სტაბილური მაკროეკონომიკური გარემოს შემანარჩუნებელი ღონისძიებების შემუშავებაში. პრემიერ-მინისტრი ირაკლი ღარიბაშვილი ბიზნესის ფართო ჩართულობით რამდენიმე სათათბირო ორგანოს ქმნის",- განაცხადა ნათია თურნავამ.

ცნობისთვის, დღეს საქართველოს პრემიერ-მინისტრი ირაკლი ღარიბაშვილი ბიზნესასოციაციის წარმომადგენლებს შეხვდა, რომლებიც მაკროეკონომიკური მიმართულებით მუშაობენ.

მთავრობის ადმინისტრაციაში გამართულ შეხვედრაზე ყურადღება გამახვილდა მაკროეკონომიკურ საკითხებსა და პანდემიის პერიოდში ბიზნესისთვის შექმნილ გამოწვევებზე.