“საერთო სასამართლოების შესახებ” ორგანულ კანონში ცვლილებების პროექტს დაემატა მუხლი, რომელიც როგორც უმრავლესობის ლიდერმა ირაკლი კობახიძემ განმარტა, ოპოზიციასთან მოლაპარაკებების დროს დაყენებული წინადადებაა.

“როგორც მოგეხსენებათ, ოპოზიციური პარტიების მონაწილეობით პოლიტიკური დიალოგი გაიმართა. დიალოგის ფარგლებში დაყენებული იყო წინადადება, რაც ჩვენ გავიზიარეთ. საუბარია იმაზე, რომ მას შემდეგ, რაც შესაბამისი პროცედურა გადაისინჯება, ერთი კვირით გაიხსნება ვაკანსიების მიღების შესაძლებლობა დამატებითი კანდიდატებისათვის. ჩვენი სურვილია, რომ ეს პუნქტი კანონპროექტში აისახოს“, - განაცხადა კობახიძემ პარლამენტის პლენარულ სხდომაზე.

“საერთო სასამართლოების შესახებ“ ორგანულ კანონში დაგეგმილი ცვლილებები, რომლის საფუძველზეც იუსტიციის უმაღლესი საბჭოს მიერ უზენაესი სასამართლოს მოსამართლეობის კანდიდატების შერჩევისა და პარლამენტისათვის წარდგენის წესში ცვლილებები ხორციელდება, პარლამენტმა მეორე მოსმენით მიიღო.