თურქეთი ადგილობრივი წარმოების ვაქცინის გამოყენების დაწყებას ზაფხულის ბოლოსთვის გეგმავს, - ადგილობრივი მედიის ინფორმაციით, ამის შესახებ ქვეყნის ჯანდაცვის მინისტრმა ფაჰრეთინ კოჩამ განაცხადა.

„მჯერა, რომ ჩვენი პირველი ვაქცინა მზად და წარმატებული იქნება აგვისტოსთვის, სექტემბრამდე, ზაფხულის ბოლომდე”, - აღნიშნა კოჩამ.

მისივე თქმით, ჯანდაცვის მსოფლიო ორგანიზაციის სიაში ამჟამად 18 თურქული კანდიდატი ვაქცინაა წარმოდგენილი.

რაც შეეხება თურქეთში მიმდინარე ვაქცინაციის კამპანიას, ჯანდაცვის მინისტრის ინფორმაციით, ქვეყანამ 45 დღეში დაახლოებით 1.1 მილიონი ჯანდაცვის მუშაკის ვაქცინაცია განახორციელა.