ინდონეზიასა და აღმოსავლეთ ტიმორში წყალდიდობის შედეგად დაღუპულთა რაოდენობამ 50-ს გადააჭარბა
ინდონეზიასა და მეზობელ აღმოსავლეთ ტიმორში წყალდიდობის შედეგად დაღუპულთა რაოდენობამ 50-ს გადააჭარბა, - ამის შესახებ ინფორმაციას BBC-ი ავრცელებს.
გამოცემის ცნობით, ოფიციალური პირები აცხადებენ, რომ დაღუპულთა რიცხვი, შესაძლოა, კიდევ უფრო გაიზარდოს, რადგან მაშველები დაკარგულების ძებნას კვლავ აგრძელებენ.
”სტიქიამ ოთხი ქვეოლქი და შვიდი სოფელი დააზარალა. მონაცემების გადამოწმების შემდეგ, აღმოვაჩინეთ, რომ დაიღუპა 41, დაშავდა 9 და დაკარგულად ითვლება 27 ადამიანი”, - განუცხადა ჟურნალისტებს ინდონეზიის კატასტროფის რისკის შემცირების სააგენტოს პრესსპიკერმა რადიტია ჯატიმ.
ამასთან, 11 დაღუპულის შესახებ ავრცელებენ ინფორმაციას აღმოსავლეთ ტიმორის ოფიციალური პირები.
ინდონეზიის არქიპელაგზე ფატალური შედეგის მქონე წყალდიდობა და მეწყერი მუსონური სეზონის განმავლობაში ხშირია. ეს სეზონი, ჩვეულებრივ ნოემბრიდან მარტამდე პერიოდში გრძელდება.
