მოსკოვისა და ვაშინგტონის წარმომადგენლებს შორის დონბასში შექმნილ ვითარებასთან დაკავშირებით კონტაქტი შედგა, - ამის შესახებ რუსეთის საგარეო საქმეთა მინისტრის მოადგილემ სერგეი რიაბკოვმა რუსულ მედიასთან საუბარში განაცხადა.
„დონბასში არსებულ სიტუაციასთან დაკავშირებით ჩვენ აშშ-ის ადმინისტრაციასთან კონტაქტი გვქონდა. ამერიკულ მხარეს ამომწურავი ინფორმაცია მივაწოდეთ იმასთან დაკავშირებით, თუ რა ხდება”, - აღნიშნა რიაბკოვმა.
მისი თქმით, შეინიშნება კიევის და მისი დასავლელი მფარველების, აშშ-ის ხელმძღვანელობით, პროვოკაციული და გამომწვევი ქმედებები.
„ვაშინგტონი ამ კოორდინირებული პოლიტიკის შედეგებით შეშფოთებული უნდა იყოს,“ - აღნიშნა რუსმა დიპლომატმა.
შეგახსენებთ, აშშ-ის სახელმწიფო დეპარტამენტის პრესსპიკერის, ნედ პრაისის განცხადებით, აშშ რუსეთს მოუწოდებს, თავი შეიკავოს ესკალაციის გამომწვევი ქმედებებისგან. მისი თქმით, აშშ-მა უკრაინის საზღვართან ბოლო პერიოდის პროვოკაციების შესახებ რუსეთისგან ახსნა-განმარტება მოითხოვა. „ჩვენ რუსეთს ამ პროვოკაციების შესახებ ახსნა-განმარტება ვთხოვეთ ,”- აღნიშნა ნედ პრაისმა.