დანია პირველი ქვეყანა გახდა ევროპაში, რომელმაც ე.წ.კოვიდპასპორტის სქემა აამოქმედა, - ამის შესახებ ინფორმაციას „ევრონიუსი“ ავრცელებს.
გამოცემის ცნობით, დოკუმენტი, აპლიკაციის, ან დაბეჭდილი სახით, ხელმისაწვდომი იქნება იმ ადამიანებისთვის, რომლებიც სრულად არიან ვაქცინირებული, კორონავირუსი 2-12 კვირის წინ დაუდასტურდათ, ან გასული 72 საათის განმავლობაში აღებულ ტესტზე უარყოფითი პასუხი აქვთ მიღებული. ამ ეტაპზე „კოვიდპასპორტი“ საშუალებას აძლევს მოქალაქეებს ესტუმრონ საპარიკმახეროებს, სილამაზის სალონებს, ავტოსკოლებს. მოგვიანებით კი, მისი მფლობელები მუზეუმებში, რესტორნებში, თეატრებსა და კინოთეატრებში შესვლასაც შეძლებენ, რომელთა გახსნაც ქვეყანაში 6 მაისიდან იგეგმება.
აღსანიშნავია, რომ მთავრობა ეკონომიკის სრულ გახსნას 21 მაისიდან გეგმავს, როდესაც, მათი ვარაუდით, 50 წელს გადაცილებული მოქალაქეების ვაქცინაცია დასრულებული იქნება. დანიის იუსტიციის სამინისტროს განმარტებით, ბიზნეს ობიექტები, რომლებიც იმ მოქალაქეებს მოემსახურებიან, რომლებსაც „კოვიდპასპორტი“ არ აქვთ, 400 ევროთი დაჯარიმდებიან, რეგულაციის განმეორებით დარღვევის შემთხვევაში კი ჯარიმის ოდენობა 6 000 ევრომდე გაიზრდება.
რაც შეეხება მომხმარებლებს, რეგულაციის დარღვევის შემთხვევაში მათ 330 ევროს ოდენობის ჯარიმა დაეკისრებათ.
ცნობისათვის, ამ დროისთვის დანიის კორონავირუსზე სრულად ვაქცინირებული დანიის მოსახლეობის 7 პროცენტია, ვაქცინის პირველი დოზა კი 13.3 პროცენტს აქვს გაკეთებული. ქვეყნის მოსახლეობა, დაახლოებით 5.8 მილიონს შეადგენს.