სიტუაციის განმუხტვის გასაღები, როგორც აქამდე, მომავალშიც თავად ნიკა მელიას ხელშია, - ამის შესახებ საპარლამენტო უმრავლესობის წევრმა ალუდა ღუდუშაურმა ჟურნალისტებთან განაცხადა.

როგორც ალუდა ღუდუშაურმა აღნიშნა, თუ მელიას მაღალი პოლიტიკური პასუხისმგებლობა აქვს, მან პოლიტიკურ პროცესებს ხელი უნდა შეუწყოს.

„ნიკა მელია ამბობს, რომ პატიმრობაში დატოვებენ, მისი ადვოკატები აცხადებენ, რომ გამოუშვებენ. სჯობს, ჩამოყალიბდნენ. სასამართლო არის ობიექტური და მტკიცებულებებზე დაყრდნობით ობიექტურ გადაწყვეტილებას მიიღებს. სასამართლომ რომ გამოუშვას, ესეც პოლიტიკური გადაწყვეტილება იქნება?

სიტუაციის განმუხტვის გასაღები როგორც აქამდე, ასევე მომავალშიც თავად მელიას ხელშია. თუ მელიას, როგორც ძლიერი ოპოზიციური პარტიის ხელმძღვანელს, მაღალი პოლიტიკური შეგნება და პასუხისმგებლობა აქვს, მან პოლიტიკურ პროცესებს ხელი უნდა შეუწყოს. წინააღმდეგ შემთხვევაში, ვერც სასამართლო და ვერც სხვა ინსტიტუცია ვერ მიიღებს სხვა გადაწყვეტილებას“, - განაცხადა ღუდუშაურმა.

ცნობისათვის, ნიკა მელიას სასამართლო პროცესი 8 აპრილს არის ჩანიშნული.