ბოდბელმა მთავარეპისკოპოსმა, მეუფე იაკობმა ქადაგებისას მედიას მიმართა, რომ შეუძლიათ ხელისუფლებისა და ოპოზიციის შესარიგებლად მეტი წვლილი შეიტანონ. როგორც მან აღნიშნა, მიმდინარე პოლიტიკურ პროცესებს რუსეთიც აქტიურად ადევნებს თვალს.

„ძალიან ბევრი შეგიძლიათ ტელევიზიებს. გააკეთეთ ის, რომ შერიგებისთვის მეტად იღვაწოთ. შეგიძლიათ ეს, დიდი ძალა ხართ. მარტო რაღაცის ინსტრუმენტი არ უნდა იყოთ. რაც შეგიკვეთეს, აკეთებთ იმას, მაგრამ უფრო დიდი შეკვეთა გაქვთ ქართველი ერისგან შერიგებასთან დაკავშირებით იმიტომ, რომ ქართველი ერი ვერ გადარჩება. რუსებს რომ არ უხაროდეს ჩვენი ეს მდგომარეობა და კიდევ სხვას, ვინც ასე უყურებს ჩვენს ქვეყანას, აქამდე შემოვიდოდნენ. უყურებენ, ახლა რაც ხდება აწყობთ და იმიტომ არ გვესხმიან თავს. ამიტომაც დავფიქრდეთ, ვის საქმეს ვაკეთებთ და ვის არა“,-აღნიშნა მეუფე იაკობმა.