საგარეო საქმეთა მინისტრის, დავით ზალკალიანის განცხადებით, ოპოზიციასა და მმართველ გუნდს შორის ფასილიტატორების ჩართულობით მოლაპარაკებები უნდა გაგრძელდეს და ლოგიკურ დასასრულამდე მივიდეს.

როგორც მან ჟურნალისტებთან საუბრისას განაცხადა, ქვეყანას არ აქვს ფუფუნება, რომ „ხელოვნურ პოლიტიკურ კრიზისში“ იყოს შესული.

„შეთანხმება უნდა შედგეს. როგორც ჩვენი ყველა სტრატეგიული პარტნიორი მოგვიწოდებს, ჩვენ არ გვაქვს იმის ფუფუნება, რომ ქვეყანა იყოს შესული ხელოვნურ პოლიტიკურ კრიზისში. ჩვენ აუცილებლად უნდა დავასრულოთ ის გამოწვევები, რაც ქვეყნის წინაშეა. ეს ვერ იქნება დაძლეული შიდა კონსოლიდაციის გარეშე, პრობლემების ქუჩიდან პარლამენტში გადატანის გარეშე“, - აცხადებს ზალკალიანი.