რუსეთის სახელმწიფო სათათბიროს საერთაშორისო საქმეთა კომიტეტის წევრი ელენა პანინა აშშ-ის მიერ შავ ზღვაში სამხედრო გემების შესაძლო გაგზავნის შესახებ გავრცელებულ ინფორმაციას ეხმიანება და აცხადებს, რომ ეს ნაბიჯი დონბასის გარშემო სიტუაციის კიდევ უფრო გამწვავებას გამოიწვევს.
“ეს იქნება სიგნალი არა რუსეთისთვის, არამედ უკრაინელი ნაციონალ-რადიკალებისთვის. სიგნალი, რომელიც ქმნის ცრუ ილუზიებს ამ პუბლიკისთვის”, - აღნიშნა პანინამ.
შეგახსენებთ, გუშინ ტელეკომპანია CNN-მა აშშ-ის თავდაცვის სამინისტროს თანამდებობის პირზე დაყრდნობით გაავრცელა ინფორმაცია, რომ უკრაინის აღმოსავლეთ საზღვრებთან რუსული სამხედრო ძალების ზრდის ფონზე, აშშ, უკრაინის მიმართ მხარდაჭერის გამოხატვის დემონსტრირების მიზნით, შავ ზღვაში უახლოეს კვირებში სამხედრო გემების გაგზავნის საკითხს განიხილავს.