სმოლენსკის ავიაკატასტროფის 11 წლისთავთან დაკავშირებით ვარშავაში სამგლოვიარო ღონისძიება გაიმართა, თუმცა პარალელურად აქციის მონაწილეებსა და პოლიციას შორის შეტაკება მოხდა.

როგორც ადგილობრივი სააგენტო Wirtualna Polska იუწყება, პროტესტის მონაწილეები შეეცადნენ ხელი შეეშალათ ცერემონიისთვის, როდესაც ქვეყნის პრეზიდენტ ანჟეი დუდას მონაწილეობით, ხელისუფლების წარმომადგენლებმა ავიაკატასტროფის დროს დაღუპული ლეხ და მარია კაჩინსკების საფლავთან ყვავილები მიიტანეს.

გავრცელებული ინფორმაციით, დემონსტრანტების შესაკავებლად პოლიციამ ცრემლსადენი გაზი გამოიყენა და რამდენიმე ადამიანი დააკავა.

სმოლენსკის ავიაკატასტროფიდან 11 წელი გავიდა. 2010 წლის 10 აპრილს რუსეთის ქალაქ სმოლენსკის მახლობლად თვითმფრინავი Ту-154 ჩამოვარდა, რომლის ბორტზეც პოლონეთის პრეზიდენტი ლეხ კაჩინსკი იმყოფებოდა. კატასტროფას 96 ადამიანი ემსხვერპლა.