დასავლეთ ავსტრალიას ტროპიკულმა ციკლონმა „სეროჟამ“ გადაუარა, - ამის შესახებ ინფორმაციას BBC-ი ავრცელებს.

მესამე კატეგორიის ქარიშხალი, ქალაქ კალბარის მიმდებარე ტერიტორიას დაატყდა თავს და ქარის სიჩქარემ საათში 170 კმ-ს მიაღწია.

მოსახლეობის ინფორმაციით, სტიქიის შედეგად დაინგრა სახლები, წაიქცა ხეები და დაზიანდა ელექტროგადამცემი ხაზები.

მეტეოროლოგიის ბიუროს განცხადებით, ქარიშხალი შესუსტდა, თუმცა მისი გაძლიერება დღესაც მოსალოდნელია.

შტატის სამხრეთ-აღმოსავლეთის რამდენიმე ქალაქი კვლავ „წითელი განგაშის ქვეშ" რჩება, რაც ნიშნავს, რომ ხელისუფლება მოსახლეობას თავშესაფრებში გადასვლას ურჩევს.

საგანგებო სიტუაციების სააგენტოები აცხადებენ, რომ ზარალის ზუსტი დათვლა ჯერჯერობით შეუძლებელია.