მიხეილ სარჯველაძე სანქციებთან დაკავშირებით კითხვაზე - მოვლენების ასეთი დრამატული განვითარება მოსალოდნელი არ არის და საამისოდ არ არსებობს წინაპირობები
მოვლენების ასეთი დრამატული განვითარება მოსალოდნელი არ არის და საამისოდ არ არსებობს წინაპირობები,- ასე პასუხობს ადამიანის უფლებათა კომიტეტის თავმჯდომარე მიხეილ სარჯველაძე ჟურნალისტების კითხვას, გააფრთხილეს თუ არა ელჩებმა ხელისუფლება შეუთანხმებლობის შემთხვევაში მოსალოდნელ სანქციებთან დაკავშირებით.
სარჯველაძის თქმით, მოლაპარაკებების გაგრძელება არ ნიშნავს იმას, რომ „რომელიმე მხარის მიმართ და მითუმეტეს ხელისუფლების მიმართ ასეთი კატეგორიული ტონი არსებობდეს".
მისივე თქმით, ოპოზიციაში არიან პოლიტიკური ძალები, ვისაც მოლაპარაკების შედეგით დასრულება არ სურთ, თუმცა, მისი შედეგიანად დასრულების იმედი არსებობს.
„რა თქმა უნდა, იმედიანად ვართ განწყობილნი და სხვადასხვა ხარისხის არის ეს იმედი იმის მიხედვით, თუ ვისზე ვსაუბრობთ ოპოზიციის რიგებში. ყველას ერთნაირი მზაობა, რომ მოლაპარაკებები შედეგიანად დასრულდეს, სამწუხაროდ არ აქვს. თუმცა, არსებობს იმედის ქონის საფუძველი, რომ მოლაპარაკებები შედეგიანი შეიძლება აღმოჩნდეს. ალბათ, ეს არის მიზეზი, რის გამოც ასევე იმედიანად არიან განწყობილნი ელჩები, ჩვენი ქვეყნის სხვადასხვა პარტნიორები და გვესაუბრებიან იმასთან დაკავშირებით, რომ სასურველია გადაიდგას ნაბიჯები მოლაპარაკებების შედეგიანად დასრულებისთვის,"- განაცხადა სარჯველაძემ.
