ირანი ნატანცის ბირთვულ ობიექტზე მომხდარ ინციდენტში ისრაელს ადანაშაულებს, - მედიის ინფორმაციით, შესაბამისი განცხადება ირანის საგარეო საქმეთა მინისტრმა მუჰამედ ჯავად ზარიფმა გააკეთა.

„სიონისტებს სანქციების მოხსნის გზაზე ჩვენი პროგრესის გამო შურისძიება სურთ. მათ საჯაროდ თქვეს, რომ ამას არ დაუშვებენ. მაგრამ ჩვენ ამის გამო შურს ვიძიებთ,“- აღნიშნა ზარიფმა.

ამასთან, ირანის საგარეო საქმეთა სამინისტროს პრესსპიკერმა საიდ ხატიბზადემ დღეს გამართულ პრესკონფერენციაზე განაცხადა, რომ ნატანცის ინციდენტი „კაცობრიობის წინააღმდეგ ჩადენილ ქმედებად” შეიძლება ჩაითვალოს.

„ჩვენი ბირთვული ექსპერტები აფასებენ მიყენებულ ზარალს, მაგრამ გარწმუნებთ, რომ ირანი ნატანცის ურანის გამამდიდრებელ დაზიანებულ ცენტრიფუგებს წარმატებით შეცვლის”, - აღნიშნა ხატიბზადემ.

შეგახსენებთ, გუშინ ცნობილი გახდა, რომ ირანის ნატანცის ბირთვული ობიექტის ელექტროგანაწილების ქსელის პრობლემამ ინციდენტი გამოიწვია. „ირანის ატომური ენერგიის ორგანიზაციის“ პრესსპიკერის ბეჰრუზ კამალვანდის თქმით, „ინციდენტს მსხვერპლი და დაბინძურება არ მოჰყოლია”.

ბირთვული ობიექტი, რომელიც ისპაჰანში, უდაბნოში მდებარეობს, არის ირანის ურანის გამდიდრების პროგრამის ცენტრი და მას გაეროს ბირთვული მაკონტროლებელი ორგანიზაციის, ატომური ენერგიის საერთაშორისო სააგენტოს, ინსპექტორები აკონტროლებენ.