რუსეთის საგარეო საქმეთა მინისტრის მოადგილე - ჩვენ ვიცავთ ჩვენს ინტერესებს, ჩვენი მოქალაქეების ინტერესებს და გავაგრძელებთ მათ დაცვას

აშშ-ის განცხადებები იმის შესახებ, რომ რუსეთს დონბასში შექმნილი ვითარების გამო, საფასურის გადახდა მოუწევს, მიუღებელია, - ამის შესახებ რუსეთის საგარეო საქმეთა მინისტრის მოადგილემ სერგეი რიაბკოვმა განაცხადა.

მისი თქმით, მოსკოვი გააგრძელებს თვითგამოცხადებული რესპუბლიკის მკვიდრთა დაცვას.

„ისინი მაღალ ფასზე საუბრობენ, მაგრამ მას არასდროს ასახელებენ. ჩვენ უბრალოდ ვიცავთ ჩვენს ინტერესებს, ჩვენს მოქალაქეებს, რუსულენოვანი მოსახლეობის ინტერესებს, ჩვენ მათ დაცვას გავაგრძელებთ,"- განაცხადა რუსმა დიპლომატმა.

მისი თქმით, ნებისმიერი მუქარა რუსეთს კიდევ უფრო მეტად არწმუნებს იმაში, რომ სწორ კურსს ატარებს.