ირანის პრეზიდენტი, ჰასან რუჰანი აცხადებს, რომ ურანის 60%-მდე გამდიდრება ნატანზის ბირთვულ ობიექტზე განხორციელებულ საბოტაჟზე პასუხია, - ამის შესახებ ინფორმაციას Reuters-ი ავრცელებს.

„რა თქმა უნდა, უშიშროებისა და დაზვერვის წარმომადგენლებმა უნდა წარმოადგინონ საბოლოო ანგარიში, მაგრამ აშკარაა, რომ ეს სიონისტების მიერ ჩადენილი დანაშაულია და თუ სიონისტები ჩვენი ერის წინააღმდეგ იმოქმედებენ, ჩვენ ვუპასუხებთ. ჩვენი პასუხი მათ ბოროტმოქმედებაზე არის დაზიანებული ცენტრიფუგების უფრო თანამედროვე ცენტრიფუგებით ჩანაცვლება და ნატანცის ობიექტზე 60%-მდე გამდიდრების დაწყება,“ - აღნიშნა ირანის პრეზიდენტმა.

მისი მტკიცებით, ირანის ისლამური რესპუბლიკა ბირთვული იარაღის შექმნას არ გეგმავს.

ცნობისთვის, გუშინ ცნობილი გახდა, რომ ირანი ურანის 60 %-მდე გამდიდრების პროცესის დაწყებას 14 აპრილიდან გეგმავს.

ირანსა და ექვს ქვეყანას შორის 2015 წელს გაფორმებული ბირთვული შეთანხმების თანახმად, ურანის გამდიდრების ზედა ზღვარი 3.67%-ია.