დიმიტრი პესკოვი - ვლადიმერ პუტინსა და ჯო ბაიდენს შორის შესაძლო შეხვედრის დეტალებზე საუბარი ნაადრევია
მოსკოვი მიიჩნევს, რომ რუსეთის და აშშ-ის პრეზიდენტების შესაძლო შეხვედრის დეტალებზე საუბარი ნაადრევია, - რუსული მედიის ინფორმაციით, ამის შესახებ კრემლის პრესსპიკერმა დიმიტრი პესკოვმა დღეს განაცხადა.
”ამ შეხვედრის დეტალებზე საუბარი ნაადრევია. ეს არის ახალი წინადადება და მისი შესწავლა და გაანალიზება მოხდება”, - აღნიშნა პესკოვმა, რითაც მან უპასუხა შეკითხვას იმასთან დაკავშირებით, სად და როდის გაიმართება ორ პრეზიდენტს შორის შეხვედრა.
მისი თქმით, ლიდერები შეთანხმდნენ, რომ შეხვედრის საკითხი დიპლომატიური არხების საშუალებით განიხილება.
შეგახსენებთ, გუშინ აშშ-ის და რუსეთის პრეზიდენტებს შორის სატელეფონო საუბარი შედგა, რომლის დროსაც ჯო ბაიდენმა ვლადიმერ პუტინს უკრაინაში დაძაბულობის დეესკალაციისკენ მოუწოდა და მესამე ქვეყანაში შეხვედრა შესთავაზა.
