თბილისის მერიამ და პროექტმა „თბილისი - წიგნის მსოფლიო დედაქალაქი“  სახელმწიფო ენის დღე აღნიშნეს

თბილისის მერიამ და იუნესკოს პროექტმა „თბილისი - წიგნის მსოფლიო დედაქალაქი“ სახელმწიფო ენის დღე აღნიშნეს.

როგორც „ინტერპრესნიუსს“ დედაქალაქის მერიიდან აცნობეს, ღონისძიებას თბილისის მერის მოადგილე ანდრია ბასილაია დაესწრო.

მათივე ცნობით, ღონისძიებათა სერია აერთიანებდა როგორც სალექციო და სამუშაო ხასიათის შეხვედრებს, ასევე, აქტივობებს ბავშვებისთვის. პატარებს ზღაპრები ცნობილმა მსახიობებმა წაუკითხეს, კითხვის შემდეგ კი, მოსმენილის შინაარსის განხილვა გაიმართა.

„მთავარ პანელურ დისკუსიაში 1978 წლის 14 აპრილის მოვლენების მონაწილე თამარ მახარობლიძემ, ნანა მაჭავარიანმა და გიორგი ალიბეგაშვილმა მაშინდელი პერიპეტიები გაიხსენეს. საუბარი შეეხო აქციების გამომწვევ მიზეზებს, სტუდენტების მობილიზების პროცესს, უცხოურ პრესაში გამოხმაურებას და სხვა მნიშვნელოვან ფაქტებს. დისკუსიის დაწყებამდე, წარმოდგენილი იყო მოკლემეტრაჟიანი დოკუმენტური ფილმი, რომლის გმირებმაც განსხვავებული პერსპექტივიდან შეაფასეს მაშინდელი მოვლენები და მათი გავლენა თანამედროვე საზოგადოებაზე”, - აღნიშნავენ მერიაში.

მათივე ინფორმაციით, ღონისძიებაზე შემოქმედებითი წერის სპეციფიკის შესახებ ისაუბრეს მწერლებმა - თამთა მელაშვილმა და დათო გაბუნიამ, ხოლო რედაქტორმა ანა ჭაბაშვილმა და ლიტერატურის კრიტიკოსმა ლევან ბრეგაძემ ენის გათანამედროვების საკითხები მიმოიხილეს. პარალელურად მიმდინარეობდა სასწავლო შეხვედრები ბავშვებისა და მოზრდილებისთვის ილუსტრაციის, კალიგრაფიის, კომიქსის შექმნის ხელოვნების, ტიპოგრაფიისა და კვლევაზე მუშაობის საკითხებზე.

„დღევანდელი ღონისძიება კიდევ ერთხელ ადასტურებს, რომ ჩვენი სახელმწიფოებრიობის ერთ-ერთი უდიდესი მონაპოვარი, ქართული ენის შენარჩუნება და დაცვაა. მინდა, მადლობა გადავუხადო ყველა იმ ადამიანს, ვინც, მრავალი წლის წინ, ხმა აღიმაღლა და საბჭოთა კავშირის სურვილს წინ აღუდგა. ისინი რომ არა, ჩვენი ეროვნული იდენტობის ერთ-ერთი მთავარი განმსაზღვრელი აღარ გვექნებოდა. მოხარული ვარ, რომ, ამ დღის მიმართ ინტერესი ახალგაზრდა თაობაშიც ძლიერია, რაზეც დღევანდელ ღონისძიებაზე მათი დასწრებაც მოწმობს“, - განაცხადა თბილისის მერიის კულტურის განათლების, სპორტისა და ახალგაზრდულ საქმეთა საქალაქო სამსახურის უფროსმა ირაკლი გვილავამ.

როგორც „თბილისი - წიგნის მსოფლიო დედაქალაქის“ დირექტორმა ნინია მაჭარაშვილმა აღნიშნა, თბილისში, წიგნიერებასთან დაკავშირებული უამრავი პროექტი და ღონისძიება განხორციელდება.

„გარდა იმისა, რომ საქართველოს ისტორიის ერთ-ერთ უმნიშვნელოვანეს მოვლენას ვიხსენებთ, დღევანდელი ღონისძიება, იუნესკოს პროექტის - „თბილისი - წიგნის მსოფლიო დედაქალაქი“ ერთგვარ ანონსსაც წარმოადგენს. 23 აპრილს, თბილისი ოფიციალურად გადმოიბარებს წიგნის მსოფლიო დედაქალაქის სტატუსს, რის შემდეგაც, მთელი წლის განმავლობაში, თბილისში, წიგნიერებასთან დაკავშირებული უამრავი პროექტი და ღონისძიება განხორციელდება“, - აღნიშნა „თბილისი - წიგნის მსოფლიო დედაქალაქის“ დირექტორმა ნინია მაჭარაშვილმა.

როგორც მერიაშია აცხადებენ, UNESCO-ს გადაწყვეტილებით, თბილისი წიგნის მსოფლიო დედაქალაქის სტატუსს 2021 წლის 23 აპრილიდან, ერთი წლის განმავლობაში ატარებს.

„ პროექტის ფარგლებში, დაგეგმილია საგანმანათლებლო, შემეცნებითი, ინფრასტრუქტურული, მასობრივი და საბავშვო პროექტების განხორციელება. პროექტი „თბილისი - წიგნის მსოფლიო დედაქალაქი“ თბილისის მერიის მხარდაჭერით ხორციელდება, ხოლო მისი გენერალური სპონსორია „საქართველოს ბანკი“.

UNESCO World Book Capital (წიგნის მსოფლიო დედაქალაქი) ფართომასშტაბიანი პროექტია, რომელიც 2001 წელს UNESCO-ს გენერალური კონფერენციის გადაწყვეტილებით დაარსდა. ის მიზნად ისახავს წიგნისა და კითხვის პოპულარიზაციას, ხელს უწყობს წიგნის ინდუსტრიისა და მასთან დაკავშირებული ყველა სფეროს განვითარებას, თანამედროვე ავტორების, მთარგმნელების, ბიბლიოთეკებისა და გამომცემლების ხელშეწყობას”, - აღნიშნულია ინფორმაციაში.

მარინა კალიურანდი - დიახ, არჩევნებით საქართველომ დემოკრატიის ტესტი ჩააბარა, გადააბიჯა დემოკრატიულობის ზღურბლს, მაგრამ არის კითხვა, რამდენად გსურთ მხოლოდ ზღურბლს გადააბიჯოთ
ქართული პრესის მიმოხილვა 26.11.2021
ალექსანდრე თვალჭრელიძე - ხელისუფლებისადმი ნდობა დამოკიდებულია არა იმაზე, თუ რა პროგრამებს აანონსებს, არამედ იმაზე, თუ როგორ ასრულებს გაცემულ დაპირებებს
ბიძინა ლებანიძე - საქართველომ და უკრაინამ გერმანიასთან მიმართებაში ფუჭი მოლოდინი არ უნდა შეიქმნას, გერმანია სამხედრო თვალსაზრისით არ ჩაერთვება არც ერთ სამეზობლო კონფლიქტში
სილქფესტი ფასდაკლების დღეებს უერთდება - გაეცანით სილქნეტის მთავარ შეთავაზებებს
ზეთისხილის საერთაშორისო საბჭოს 114-ე სესია, რომელიც საქართველოში მიმდინარეობდა, დასრულდა
პროგრამა ბალანსი ბიზნესისთვის - როგორია ფინანსების აღრიცხვისა და ავტომატიზაციის თანამედროვე სტანდარტი?
XXI საუკუნის ხელნაწერ „ვეფხისტყაოსანზე“ 18-წლიანი მუშაობა დასრულდა - რა უნდა იცოდეთ ახალ, უნიკალურ გამოცემაზე
საინფორმაციო პორტალი 08.GE - ყველა კითხვაზე პასუხი ერთ სივრცეში
საქართველო ზეთისხილის საერთაშორისო დღეს უმასპინძლებს, რომელიც იუნესკოს ეგიდით ტარდება
პირველად საქართველოში: „შატო მუხრანი“ მსოფლიოს 100 საუკეთესო ვენახს შორის 58-ე ადგილს იკავებს