ჩეხეთის შინაგან საქმეთა მინისტრი იან გამაჩეკი, რომელიც დროებით საგარეო საქმეთა მინისტრის თანამდებობასაც იკავებს, გამოდის ინიციატივით, პრაღა გახდეს ის ქალაქი, სადაც ამერიკისა და რუსეთის პრეზიდენტები ჯო ბაიდენი და ვლადიმერ პუტინი ერთმანეთს შეხვდებიან. ამის შესახებ ადგილობრივი მედია იუწყება.

„მე ვუპასუხე პრეზიდენტ ბაიდენის განცხადებას, რომელმაც პრეზიდენტ პუტინს მოუწოდა პირისპირ შეხვედრა მესამე ქვეყანაში გამართონ. მე ჩვენ ელჩებს დავავალე ვაშინგტონსა და მოსკოვში, შესთავაზონ პრაღა შესაძლო შეხვედრის ადგილად, როგორც ეს ობამა-მედვედევის სამიტისას მოხდა. თუმცა, ყველაფერი საწყის სტადიაზეა“, - განაცხადა გამაჩეკმა.

ცნობილია, რომ ფინეთმაც გამოთქვა მზადყოფნა, ბაიდენი-პუტინის შესაძლო შეხვედრას უმასპინძლოს.

მედიის ინფორმაციით, ჯო ბაიდენმა ვლადიმერ პუტინს შეხვედრა გუშინდელი სატელეფონო საუბრის დროს შესთავაზა.