გასული კვირების განმავლობაში, რუსეთმა მნიშვნელოვნად გააძლიერა სამხედრო დაჯგუფებები უკრაინის საზღვრის ჩრდილო-აღმოსავლეთის მიმართულებით, რომელიც ამ დროისთვის არანაკლებ 110 000 სამხედრო მოსამსახურეს ითვლის. ამის შესახებ უკრაინის თავდაცვის მინისტრმა ანდრეი ტარანმა ევროპარლამენტის თავდაცვისა და უსაფრთხოების ქვეკომიტეტის სხდომაზე ვირტუალური გამოსვლის დროს განაცხადა.

მისი თქმით, ეს კრემლს პოტენციურად საშუალებას აძლევს ფართომასშტაბიანი სამხედრო პროვოკაცია განახორციელოს.

„საფრთხის შემცველად რჩება უკრაინის ჩრდილო-აღმოსავლეთის მიმართულება. სარწმუნო მონაცემები უფლებას გვაძლევს განვაცხადოთ, რომ იქ დამატებითი ქვედანაყოფების გადაადგილება გრძელდება რუსეთის მხრიდან. რუსეთის ჯარების საექსპედიციო განლაგება და საერთო სიმძლავრე, რომლებიც ამჟამად კონცენტრირებულები არიან უკრაინის საზღვრის გასწვრივ, შეადგენს 56 ტაქტიკურ ჯგუფს ბატალიონის დონეზე, 110 ათასი სამხედრო მოსამსახურესთან ერთად“ , - განაცხადა ტარანმა.

მისი თქმით, გაცილებით ფართო გაგებით, რუსეთი განაგრძობს თავისი შემტევი შესაძლებლობების ამაღლებას.

„ჩვენ ასევე უნდა გავითვალისწინოთ პოლიტიკური და უსაფრთხოების კუთხით განვითარება ბელარუსში, რამაც პოტენციურად შეიძლება მიგვიყვანოს რუსეთის მუდმივ სამხედრო ყოფნასთან ამ ქვეყანაში. თუკი ეს მოხდება, ეს იქნება „თამაშის წესების ცვლილება“ არა მხოლოდ უკრაინისთვის, არამედ მთლიანად აღმოსავლეთ ევროპისთვის, განსაკუთრებით, კალინინგრადში რუსეთის სამხედრო დაჯგუფებასთან კომბინაციაში“, - განაცხადა ტარანმა.