პოლონეთმა სამი რუსი დიპლომატი პერსონა ნონ გრატად გამოაცხადა, - ამის შესახებ პოლონეთის საგარეო საქმეთა სამინისტროს განცხადებაშია აღნიშნული.

„2021 წლის 15 აპრილს, პოლონეთში რუსეთის ფედერაციის ელჩი პოლონეთის რესპუბლიკის საგარეო საქმეთა სამინისტროში იქნა დაბარებული. ელჩს დიპლომატიური ნოტა გადაეცა, რომელშიც აღნიშნულია, რომ ვარშავაში რუსეთის ფედერაციის საელჩოს სამი თანამშრომელი პერსონა ნონ გრატად გამოცხადდა. ამ გადაწყვეტილების საფუძველი დიპლომატიური სტატუსის დარღვევა და აღნიშნული პირების მიერ პოლონეთის რესპუბლიკის საზიანოდ საქმიანობის განხორციელებაა“, - ნათქვამია პოლონეთის საგარეო უწყების განცხადებაში.

პოლონეთის საგარეო საქმეთა სამინისტროში აღნიშნავენ, რომ პოლონეთი სრულ სოლიდარობას უცხადებს აშშ-ის 15 აპრილის გადაწყვეტილებას რუსეთის წინააღმდეგ სანქციების დაწესების შესახებ.