რუსეთმა უკრაინის კონსულს ქვეყნის დატოვებისთვის კონკრეტული დრო განუსაზღვრა
რუსეთის საგარეო საქმეთა სამინისტრომ უკრაინის გენერალური საკონსულოს კონსულ ალექსანდ სოსონიუკს ქვეყნის დატოვებისთვის კონკრეტული დრო განუსაზღვრა. ამის შესახებ ქვეყნის საგარეო საქმეთა სამინისტროს მიერ გავრცელებულ განცხადებაშია ნათქვამი.
რუსეთის მხარის ინფორმაციით, სანქტ-პეტერბურგში უკრაინის კონსულის დაკავებასთან დაკავშირებით, სამინისტროში დაიბარეს უკრაინის ელჩის მოვალეობის შემსრულებელი ვასილი პოკოტილო, რა დროსაც რუსულმა მხარემ მიუთითა, რომ მისთვის ამ სახის საქმიანობა დაუშვებელია, არ შეესაბამება თანამდებობის პირის სტატუსს და ზიანს აყენებს რუსეთის ფედერაციის უსაფრთხოების ინტერესებს.
„უკრაინულ მხარეს ეცნობა, რომ რუსეთის ტერიტორიაზე სოსონიუკის ყოფნა არასასურველია და რეკომენდაცია გაიცა, რომ მან რუსეთის საზღვრები 19 აპრილიდან 72 საათის განმავლობაში დატოვოს“, - წერია რუსეთის საგარეო საქმეთა სამინისტროს ინფორმაციაში.
მანამდე ცნობილი გახდა, რომ რუსეთის უშიშროების ფედერალურმა სამსახურმა სანქტ-პეტერბურგში უკრაინის გენერალური საკონსულოს კონსული ალექსანდ სოსონიუკი სამართალდამცავი ორგანოების მონაცემთა ბაზიდან საიდუმლო ინფორმაციის მოპოვებისთვის დააკავა. ალექსანდ სოსონიუკი დაკავებიდან რამდენიმე საათში გაათავისუფლეს და უკრაინის დიპლომატიურ უწყებაში გადაიყვანეს.
