უკრაინის პრეზიდენტმა ვლადიმერ ზელენსკიმ ხელი მოაწერა კანონს, რომელიც მობილიზაციის გამოცხადების გარეშე რეზერვისტების სამხედრო სამსახურისთვის გამოძახების საშუალებას იძლევა, - ამის შესახებ ინფორმაციას უკრაინული მედია ავრცელებს.
„ამით შესაძლებელი გახდება თავდაცვის ძალების სამხედრო ნაწილების რეზერვისტებით დაკომპლექტება, რაც მნიშვნელოვნად გაზრდის მათ საბრძოლო ეფექტურობას სამხედრო აგრესიის დროს”, - განაცხადეს პრეზიდენტის ადმინისტრაციაში.
საკანონმდებლო ცვლილებები უკრაინის პარლამენტმა მარტის ბოლოს დაამტკიცა. შეგახსენებთ, მარტის ბოლოდან უკრაინის საზღვრებთან და ოკუპირებულ ყირიმში, სადაც ათასობით რუსი ჯარისკაცია მობილიზებული, ვითარება დაძაბულია.