რუსეთში აშშ-ის საელჩოს ხელმძღვანელის მოადგილე საგარეოს საქმეთა სამინისტროში დაიბარეს, - ამის შესახებ ინფორმაციას რუსული მედია ქვეყნის საგარეო უწყებაზე დაყრდნობით ავრცელებს.

„დღეს საგარეო საქმეთა სამინისტრომ ამერიკის საელჩოს ხელმძღვანელის მოადგილე დაიბარა“, - აცხადებენ საგარეო უწყებაში.

მედიის ინფორმაციით, სხვა დეტალები ამ დროისთვის უცნობია.

შეგახსენებთ, აშშ-ის ელჩმა რუსეთში ჯონ სალივანმა გუშინ განაცხადა, რომ ვაშინგტონში კონსულტაციებისთვის გაემგზავრება და მოსკოვში უახლოეს კვირებში დაბრუნდება.

„მიმაჩნია, რომ ჩემთვის მნიშვნელოვანია, ბაიდენის ადმინისტრაციაში ჩემს ახალ კოლეგებს პირდაპირ ვესაუბრო აშშ-რუსეთის ორმხრივი ურთიერთობების არსებულ მდგომარეობაზე. მოსკოვში უახლოეს კვირებში დავბრუნდები“, - განაცხადა ელჩმა რუსულ მედიასთან საუბარში.

ცნობისთვის, აშშ-ის პრეზიდენტმა ჯო ბაიდენმა 15 აპრილს ხელი მოაწერა განკარგულებას რუსეთის წინააღმდეგ ახალი სანქციების დაწესების შესახებ, პასუხად კი რუსეთის საგარეო საქმეთა სამინისტრომ განაცხადა, რომ ქვეყნიდან 10 რუს დიპლომატს გააძევებდა. მოსკოვი ჯონ სალივანის გაძევებას არ გეგმავს, თუმცა ელჩს ვაშინგტონში ბაიდენის ადმინისტრაციის ოფიციალურ პირებთან კონსულტაციებისთვის ჩასვლა „ურჩიეს“.