რუსეთში, პატიმრობაში მყოფი კრემლის კრიტიკოსის, ალექსეი ნავალნის მხარდამჭერ აქციაზე 1 700-ზე მეტი ადამიანი დააკავეს, - შესაბამის ინფორმაციას მონიტორინგის ჯგუფი OVD-Info ავრცელებს.
მათივე ინფორმაციით, 780-ზე მეტი მომიტინგე სანქტ-პეტერბურგში, 119 კი - ურალის ქალაქ უფაში დააკავეს.
აქტივისტები პოლიტიკოსის განთავისუფლებას და მისთვის სამედიცინო დახმარების გაწევას ითხოვდნენ.
მოსკოვში გამართულ საპროტესტო აქციაზე, სადაც 30-მდე ადამიანი დააკავეს, მონაწლეები სკანდირებდნენ : „თავისუფლება ნავალნის!“, „შეუშვით მასთან ექიმები!“. მოსკოვში აქციას ალექსეი ნავალნის მეუღლე, იულიაც შეუერთდა.
პოლიციამ განაცხადა, რომ დედაქალაქში გამართულ აქციაზე 6 000-მდე ადამიანი იყო შეკრებილი, ნავალნის YouTube არხის ინფორმაციით, კი აქციის მონაწილეების რაოდენობა 10-ჯერ მეტი იყო.
აქციების დაწყებამდე პოლიციამ მოსკოვში, საკუთარ სახლებთან ახლოს, პოლიტიკოსის პრესსპიკერი კირა იარმიში და თანაგუნდელი, ლიუბოვ სობოლი დააკავა. იარმიშს, საპროტესტო აქციის წახალისებისთვის, 10-დღიანი პატიმრობა მიუსაჯეს, სობოლი კი - გაათავისუფლეს.
პატიმრობაში მყოფი ალექსეი ნავალნი მარტის ბოლოდან შიმშილობს. მისმა ექიმმა რამდენიმე დღის წინ განაცხადა, რომ პოლიტიკოსის ჯანმრთელობის მდგომარეობა შიმშილობის მესამე კვირაში სწრაფად უარესდება და ის, შესაძლოა, სიკვდილის პირას აღმოჩნდეს.