ისრაელის სამხრეთ ნაწილში სირიის მიწა-ჰაერის ტიპის რაკეტებით განხორციელებული თავდასხმის შედეგად დიმონას ბირთვული რეაქტორის ახლომდებარე ტერიტორიაზე გამაფრთხილებელი სირენები ჩაირთო, - მედიის ინფორმაციით, ამის შესახებ ისრაელის არმიაში აცხადებენ.
ისრაელის არმიის პრესსპიკერის თქმით, შეტევა SA-5-ის ტიპის რაკეტებით განხორციელდა, თუმცა რაკეტა რეაქტორს არ მოხვედრია. ამასთან, არ ვრცელდება ინფორმაცია დაშავებულების ან მიყენებული ზარალის შესახებ.
ისრაელის არმიის ცნობით, ისრაელმა სირიაზე საპასუხო იერიში მიიტანა.
სირიის სახელმწიფო საინფორმაციო სააგენტო SANA-ს ინფორმაციით, სირიის საჰაერო თავდაცვამ ისრაელის შეტევა მოიგერია, რომლის სამიზნე დამასკოს გარეუბანში მდებარე ტერიტორიები იყო.
ამასთან, მათივე ინფორმაციით, თავდასხმის შედეგად ოთხი ჯარისკაცი დაშავდა.
ისრაელის მედია საშუალებებში რამდენიმე კვირაა ვრცელდება ინფორმაცია, რომ დიმონას რეაქტორისა და წითელი ზღვის პორტის ”ეილატის” გარშემო საჰაერო თავდაცვა გაძლიერებულია ირანის მიერ მხარდაჭერილი ძალებისგან სარაკეტო ან დრონის გამოყენებით მოსალოდნელი თავდასხმების გამო.
ისრაელსა და ირანს შორის დაძაბულობა თეირანის ბირთვული პროგრამისა და ბოლოდროინდელი დივერსიული თავდასხმების გამო გამწვავდა. ამ თავდასხმებში მხარეები ერთმანეთს ადანაშაულებენ.