აშშ-ის პრეზიდენტი ჯო ბაიდენი ივნისში დიდ ბრიტანეთსა და ბელგიას ესტუმრება, რაც პრეზიდენტის რანგში საზღვარგარეთ მისი პირველი ვიზიტი იქნება, - ინფორმაციას თეთრი სახლი ავრცელებს. მათივე ცნობით, ვიზიტი გამოკვეთს პრეზიდენტის ერთგულებას ტრანსატლანტიკური ურთიერთობების გაუმჯობესებისა და კავშირების აღდგენის მიმართულებით.
ბაიდენი 11-13 ივნისს, ბრიტანეთში, კორნუოლში „დიდი შვიდეულის“ სამიტს დაესწრება. აქვე ორმხრივ შეხვედრებს გამართავს „დიდი შვიდეულის“ ლიდერებთან, მათ შორის ბრიტანეთის პრემიერ-მინისტრ ბორის ჯონსონთან. შემდეგ ბაიდენი ბრიუსელში გაემგზავრება, სადაც 14 ივნისს დაგეგმილ ნატო-ს სამიტს დაესწრება.
როგორც თეთრ სახლში აღნიშნავენ, პრეზიდენტი ბაიდენი დაადასტურებს შეერთებული შტატების ერთგულებას ნატოს, ტრანსატლანტიკური უსაფრთხოების და კოლექტიური თავდაცვის მიმართ. ბრიუსელში ჯო ბაიდენი აშშ-ევროკავშირის სამიტშიც მიიღებს მონაწილეობას. ლიდერები განიხილავენ საერთო დღის წესრიგს გლობალური ჯანდაცვითი უსაფრთხოების უზრუნველსაყოფად, გლობალური ეკონომიკის აღდგენის სტიმულირებისთვის, კლიმატის ცვლილების მოსაგვარებლად, ციფრული და სავაჭრო თანამშრომლობის გაღრმავების, დემოკრატიის განმტკიცებისა და საგარეო პოლიტიკის საკითხების გადასაჭრელად.