პრეზიდენტი ვლადიმერ ზელენსკი დარწმუნებულია, რომ მასსა და რუსეთის პრეზიდენტ ვლადიმერ პუტინს შორის ორმხრივი შეხვედრა გაიმართება და არ გამორიცხავს, რომ შეხვედრის ადგილი ვატიკანი გახდეს, - ამის შესახებ ზელენსკიმ იტალიურ გამოცემა la Repubblica- სთან ინტერვიუში განაცხადა.
„შეხვედრა აუცილებლად შედგება. ის საჭიროა იმისთვის, რომ დონბასში ომი დასრულდეს,“- აღნიშნა ზელენსკიმ.
ჟურნალისტის შეკითხვაზე, შესაძლებელია თუ არა, რომ შეხვედრის ადგილი ვატიკანი გახდეს, ზელენსკიმ უპასუხა: „დიახ, შესაძლებელია“.
„ეს შეიძლება იყოს საუკეთესო ადგილი ყველა თვალსაზრისით. ვატიკანი ნამდვილად იდეალური ადგილია მშვიდობის შესახებ დიალოგისთვის,“ - აღნიშნა ზელენსკიმ.
შეგახსენებთ, 20 აპრილს ვლადიმერ ზელენსკიმ რუს კოლეგას „დონბასის ნებისმიერ წერტილში“ შეხვედრა შესთავაზა. 22 აპრილს ვლადიმერ პუტინმა განაცხადა, რომ მზად არის უკრაინის პრეზიდენტს მოსკოვში ნებისმიერ დროს შეხვდეს.