„მოქალაქეების” ერთ-ერთი ლიდერის ალეკო ელისაშვილის განცხადებით, მამუკა ხაზარაძის ინიციატივა 20 ივნისის საქმეზე საგამოძიებო კომისიის შექმნის თაობაზე, ამნისტიის კანონთან რელევანტური არ არის. მისი თქმით, ან საგამოძიებო კომისია უნდა შეიქმნას ან ამნისტიაზე საუბარი გაგრძელდეს.
„ეს არის ურთიერთსაწინააღმდეგო აზრი. წინააღმდეგი არ ვართ, საგამოძიებო კომისია შეიქმნას, თუმცა, რა თქმა უნდა, ან ამნისტიაზე უნდა ვილაპარაკოთ, ან საგამოძიებო კომისიის შექმნაზე. ორივე ერთად არ არის. ამასთან, საერთოდ გამაოგნებელია ის დამოკიდებულება, რომ თუ საგამოძიებო კომისია არ შეიქმნება მაშინ ამნისტია არ გვინდა. რატომ ვართ მონდომებულები, ძლივს რაღაცაზე შევთანხმდით და რატომ გვინდა ამის რევიზია. ამნისტია ხომ ნიშნავს პაუხისმგებლობისგან ადამიანების გათავისუფლებას, თან შეთანხმებული ვართ, რომ მძიმე დანაშაულებზე არ გავრცელდება. ვართ მომხრე საგამოძიებო კომისიის შექმნის, მაგრამ მაშინ ამნისტია ჰაერში გამოეკიდება”,- განაცხადა ელისაშვილმა.
ცნობისთვის, „ლელოს” ლიდერი მამუკა ხაზარაძე ინიციატივით გამოდის, რომ 20 ივნისის მოვლენებთან დაკავშირებით, საპარლამენტო კომისია შეიქმნას.