პალესტინის პრეზიდენტმა მაჰმუდ აბასმა განაცხადა, რომ პალესტინაში დაგეგმილი არჩევნების ჩატარება განუსაზღვრელი ვადით გადაიდო.

მისი თქმით, ისრაელმა შექმნა გაურკვევლობა იმასთან დაკავშირებით, დათანხმდება თუ არა ის აღმოსავლეთ იერუსალიმში მცხოვრები პალესტინელების არჩევნებში მონაწილეობას.

„ჩვენ გადავწყვიტეთ შევაჩეროთ საკანონმდებლო ორგანოს არჩევნების ჩატარება, სანამ იერუსალიმის მცხოვრებლების მონაწილეობა არ იქნება უზრუნველყოფილი“, - აღნიშნა აბასმა.

ჯერჯერობით უცნობია, გადაიდება თუ არა ივლისში დაგეგმილი საპრეზიდენტო არჩევნების ჩატარებაც.

პალესტინის პრეზიდენტმა ქვეყანაში საპარლამენტო და საპრეზიდენტო არჩევნების ჩატარება მიმდინარე წლის იანვარში დააანონსა. აბასის ოფისის მიერ გამოცემული განკარგულების თანახმად, პალესტინის მთავრობას საკანონმდებლო არჩევნები მიმდინარე წლის 22 მაისს, საპრეზიდენტო არჩევნები კი - 31 ივლისს უნდა ჩაეტარებინა. პალესტინაში საპარლამენტო არჩევნები ბოლოს 2006 წელს ჩატარდა, რომელშიც „ჰამასმა“ გაიმარჯვა, 2005 წელს გამართულ საპრეზიდენტო არჩევნებში კი გამარჯვება მაჰმუდ აბასმა მოიპოვა.