ყირგიზეთი-ტაჯიკეთის საზღვარზე, ლეილეკის რაიონში ორმხრივი სროლა განახლდა, - ამის შესახებ ინფორმაციას რუსული მედია ყირგიზულ საინფორმაციო სააგენტოზე დაყრდნობით ავრცელებს.
სააგენტოს ცნობით, სროლა დაახლოებით ერთი საათია გრძელდება. ტაჯიკეთისა და ყირგიზეთის საზღვარზე სიტუაცია 29 აპრილს დაიძაბა მას შემდეგ, რაც ორი ქვეყნის სასაზღვრო რაიონების მცხოვრებლებს შორის წყალგამანაწილებელ ობიექტთან დაკავშირებით მომხდარი კონფლიქტი ყირგიზ და ტაჯიკ მესაზღვრეებს შორის შეიარაღებულ დაპირისპირებაში გადაიზარდა.
მედიის ინფორმაციით, შეტაკებები ექვს საათზე მეტხანს გაგრძელდა, რის შედეგადაც დაიღუპა 20 და დაშავდა 150-ზე მეტი ადამიანი. 29 აპრილის საღამოს მხარეები ცეცხლის შეწყვეტასა და ჯარების მუდმივი დისლოკაციის ადგილებზე დაბრუნებაზე შეთანხმდნენ.