რუსეთის ფედერაციამ რუსული პასპორტები დონბასის ოკუპირებულ ნაწილში მცხოვრები 530 000-მდე მოქალაქისთვის გასცა, - შესაბამის ინფორმაციას სააგენტო TASS-ი რუსეთის შინაგან საქმეთა სამინისტროზე დაყრდნობით ავრცელებს.

„პრეზიდენტის 2019 წლის 24 აპრილის განკარგულების ამოქმედების შემდეგ დონეცკისა და ლუგანსკის რეგიონების გარკვეულ ადგილებში მცხოვრებმა 527 000-ზე მეტმა ადამიანმა რუსეთის მოქალაქეობა მიიღო“, - განაცხადეს რუსეთის შსს სამინისტროს პრესცენტრში.

მათივე ცნობით, რუსეთის მოქალაქეობაზე უარი, სხვადასხვა მიზეზით, 2 000-მდე ადამიანს ეთქვა.

შეგახსენებთ, 2019 წლის აპრილში რუსეთის პრეზიდენტმა ვლადიმერ პუტინმა დაამტკიცა განკარგულება ოკუპირებულ დონბასში მცხოვრებთათვის რუსული პასპორტების გაცემის პროცედურის დაჩქარების შესახებ.