ლონდონში „დიდი შვიდეულის“ მინისტერიალის პარალელურად, აშშ-ის სახელმწიფო მდივანი ენტონი ბლინკენი საგარეო პოლიტიკისა და უსაფრთხოების საკითხებში ევროკავშირის უმაღლეს წარმომადგენელს, ჟოზეფ ბორელს შეხვდა.

ევროკავშირის საგარეო ქმედებათა სამსახურის მიერ გავრცელებული ინფორმაციის თანახმად, შეხვედრაზე მხარეებმა რუსეთის საკითხზე იმსჯელეს.

„მათ განიხილეს რუსეთთან ურთიერთობები უკანონოდ ანექსირებულ ყირიმსა და უკრაინის საზღვარზე რუსეთის მიერ ბოლო პერიოდის სამხედრო მობილიზების ფონზე. საუბარი შეეხო ალექსეი ნავალნის ჯანმრთელობას, ევროკავშირის წევრების წინააღმდეგ რუსეთის ქმედებებსა და ევროკავშირის მოქალაქეების მიმართ დაწესებულ სანქციებს“, - აღნიშნულია ინფორმაციაში.

მათ ირანის ბირთვული შეთანხმების, ავღანეთის და ჩინეთთან ურთიერთობების საკითხებიც განიხილეს და შეშფოთება გამოთქვეს კოლუმბიაში მზარდი არასტაბილურობის გამო.