შეთანხმების დოკუმენტს ჰქვია "სამომავლო გზა საქართველოსთვის" და არა ნიკა მელია-სააკაშვილისთვის, როგორც ეს "ნაციონალურ მოძრაობას" უნდა რომ იყოს, - ამის შესახებ საპარლამენტო უმრავლესობის წევრმა რატი იონათამიშვილმა ჟურნალისტებთან ამნისტიის შესახებ კანონპროექტთან დაკავშირებით განაცხადა.

კითხვაზე, რატომ გახდა ამნისტიის შესახებ კანონპროექტში ბრალდებულისა და მსჯავრდებულის თანხმობის ჩადება იმისთვის, რათა ამნისტია მათზე გავრცელდეს, როცა მსგავსი პრაქტიკა მათი ხელისუფლების პირობებში მიღებულ კანონებში არ არსებობს, იონათამიშვილი აცხადებს, რომ ეს არჩევანი არის ერთ-ერთი ძირითადი დემოკრატიული პრინციპი, რომელიც ამ შემთხვევაშიც იქნება დაცული.

"ნებისმიერ პირს აქვს საშუალება ორი გზით გააგრძელოს საქმე: ან დაეთანხმოს ამნისტიას ან სამართლიანი სასამართლოს უფლებით ისარგებლოს. ამ შემთხვევაში, მასზე ამნისტია არ იქნება გავრცელებული.

ჩიხშია შესული „ნაციონალური მოძრაობა“. ისინი გამოირჩნენ როგორც ყველაზე არასერიოზული და უპასუხისმგებლო პარტია მოლაპარაკების პროცესში. ამ ადამიანების მთავარი მიზანი არის არა ის, რომ ჩვენ უზრუნველვყოთ შეთანხმების იმპლემენტაცია, არამედ ის, რომ ეს პროცესი დააზიანონ. "ქართული ოცნების" მიზანია, რომ ეს დოკუმენტი სრულფასოვნად იქნას განხორციელებული,ამ დოკუმენტს ჰქვია „სამომავლო გზა საქართველოსთვის“ და არა ნიკა მელია- სააკაშვილისთვის, როგორც ეს "ნაციონალურ მოძრაობას" უნდა რომ იყოს. ასე რომ, ჩვენ პრინციპებზე და ღირებულებებზე ვართ ორიენტირებული, „ნაციონალური მოძრაობა“ კი მარგინალურ და იმიჯ-შელახულ სახელებსა და გვარებზე,"- განაცხადა იონათამიშვილმა.