სამადაშვილი ცდილობს, რომ ყველას წინაშე მართალი იყოს, ესე არ გამოვა - ან საზოგადოების წინაშე ხარ მართალი, ან "ნაცმოძრაობის" წინაშე, - ამის შესახებ პარლამენტის პირველმა ვიცე-სპიკერმა გია ვოლსკიმ ჟურნალისტებთან განაცხადა, რითაც სალომე სამადაშვილის განცხადებას გამოეხმაურა, რომელიც აღნიშნავს, რომ ამნისტიის პროექტში ბრალდებულისა და მსჯავრდებულის თანხმობის ჩადებით, ირაკლი კობახიძე ცდილობს პროცესები ჩიხში შეიყვანოს.

მისი თქმით, სამადაშვილმა სწორი ნაბიჯი გადადგა, როცა "ნაციონალურ მოძრაობას" ჩამოშორდა, თუმცა, ახლა მისი ბრალდებები პოლიტიკურ თამაშს ჰგავს.

"კობახიძის მიმართ გამოთქმული ბრალდება უსაფუძვლოა და პოლიტიკურ თამაშს ჰგავს იმ ადამიანისგან, რომელიც თვითონ მოღალატედ შერაცხა იმ ჯგუფმა, ვისაც ჩამოცილდა. მე ვფიქრობ, მან საკმაოდ სწორი ნაბიჯი გადადგა სახელმწიფო ინტერესებიდან გამომდინარე. ახლა ცდილობს გამოვიდეს იმ მდგომარეობიდან, რომ ყველას წინაშე მართალი იყოს, ესე არ გამოვა, ან საზოგადოების წინაშე ხარ მართალი ან "ნაცმოძრაობის" წინაშე. ეს არჩევანია ყველას წინაშე, ვინც შალვა ნათელაშვილის ეზოში იკრიბებოდა,"- განაცხადა ვოლსკიმ.