ბრაზილიის პრეზიდენტი ჟაირ ბოლსონარუ აცხადებს, რომ კორონავირუსი შესაძლოა „ბიოლოგიური ომის“ წარმოების მიზნით ლაბორატორიაში იყოს შექმნილი, - ამის შესახებ ინფორმაციას „ფრანს-პრესი“ ავრცელებს.
"ეს ახალი ვირუსია. არავინ იცის ლაბორატორიაში გაჩნდა, თუ იმიტომ, რომ ადამიანმა რაღაც ცხოველი ჭამა. მაგრამ სამხედროებმა ყველაფერი იციან ქიმიური, ბიოლოგიური და რადიოლოგიური ომის შესახებ. შეიძლება ახალ ომში ბრძოლა მოგვიწიოს? საინტერესოა. რომელი ქვეყნის ეკონომიკა გაიზარდა ყველაზე მეტად?"
ბრაზილიის პრეზიდენტს ჩინეთი არ უხსენებია, თუმცა ქვეყანა, სადაც პანდემია დაიწყო, ერთადერთი იყო „დიდი ოცეულის“ ქვეყნებს შორის, რომლის ეკონომიკა გასულ წელს გაიზარდა.
ჩინეთი კატეგორიულად უარყოფს ქალაქ უხანის ლაბორატორიიდან ვირუსის გაჩენის თეორიას. ამასთან, მიმდინარე წლის მარტში ჯანდაცვის მსოფლიო ორგანიზაციის ექსპერტების მიერ გამოქვეყნებულ დასკვნაში აღნიშნულია, რომ ვერსია, რომ ეპიდემია ლაბორატორიული ინციდენტის შედეგად გაჟონვამ გამოიწვია, „უკიდურესად ნაკლებ სავარაუდოა“.